سپین کے شہرہ آفاق ٹینس سٹار اور عالمی نمبر ایک کارلوس الکاراز سنسناٹی اوپن ٹینس ٹورنامنٹ میں اپنی فتوحات کے سلسلے کو برقرار رکھتے ہوئے مردوں کے سنگلز مقابلوں کے کوارٹر فائنل راؤنڈ میں پہنچ گئے۔
امریکی ریاست اوہائیو کے شہر سنسناٹی میں جاری ایونٹ میں کانٹے دار مقابلوں کا سلسلہ شروع ہوچکا ہے، سال کے چوتھے گرینڈ سلام یو ایس اوپن سے قبل وارم اپ ٹورنامنٹ کے مینز سنگلز کے پری کوارٹر فائنل راؤنڈ میں 20 سالہ ہسپانوی ٹینس سٹار کارلوس الکاراز نے امریکی حریف کھلاڑی ٹومی پال کو شکست دے دی ۔
مردوں کے سنگلز مقابلوں کے بارش سے متاثرہ پری کوارٹر فائنل میچ میں کارلوس الکاراز نے سخت مقابلے کے بعد امریکی حریف کھلاڑی ٹومی پال کو6-7(6-8)،7-6(7-0)اور 3-6 سے ہرا کر کوارٹر فائنل کے لئے کوالیفائی کرلیا۔
کوارٹر فائنل راؤنڈ میں ان کا مقابلہ آسٹریلیا کے میکس پورسل سے ہوگا، کارلوس الکاراز رواں سیزن میں اپنے پانچویں ماسٹرز 1000 کوارٹر فائنل میں پہنچے ہیں ۔
ایک اور پری کوارٹر فائنل میچ میں جرمن ٹینس سٹار الیگزینڈر زویریف نے سابق چیمپئنز کے تھرڈ سیڈ ڈینیئل میدویدیف کو 4-6، 7-5 اور 4-6سے شکست دے کر ٹاپ ایٹ کے لئے کوالیفائی کرلیا، جہاں ان کا مقابلہ فرانسیسی حریف کھلاڑی ایڈرین مینارینو سے ہوگا۔
