نیدرلینڈز کرکٹ ٹیم کے کوچ ریان کک نے کہا ہےکہ زمبابوے کے خلاف میچ میں پاکستان کی شکست کے بعد یہ تو اندازہ ہوگیا کہ پاکستان ناقابل تسخیر ٹیم نہیں اس کو ہرایا جاسکتا ہے لہٰذا ان کی ٹیم پاکستان کو قابو کرسکتی ہے۔ پرتھ میں پاکستان اور نیدرلینڈز کے درمیان میچ سے قبل پریس کانفرنس کرتے ہوئے نیدرلینڈز کے ہیڈ کوچ ریان کک نے کہا کہ زمبابوے کیخلاف میچ میں پاکستان کی شکست کے بعد یہ تو اندازہ ہوگیا کہ پاکستان ناقابل تسخیر ٹیم نہیں، اس کو ہرایا جاسکتا ہے۔ یہ بھی پڑھیں پاک بھارت میچ: نواز کی گیند اگر پیڈ پر لگ جاتی تو اسی روز ریٹائر ہوجاتا، ایشون سابق بھارتی کپتان سنیل گواسکر بھی پاکستانی ٹیم سلیکشن پر چپ نہ رہ سکے ریان کک کا کہنا تھا کہ ہر ٹیم میچ جیتنے کی کوشش کرتی ہے، نیدرلینڈز کی بھی یہ ہی کوشش ہوگی، کچھ عرصہ قبل ہی پاکستان کے خلاف ون ڈے سپر لیگ کے میچز کھیلے تھے جس میں بہت اچھا مقابلہ کیا جس سے ٹیم کو کافی اعتماد ملا ہے، امید ہے اس بار نتائج پہلے سے بہتر ہوں گے۔ انہوں نے کہا کہ نیدرلینڈز کا بولنگ اٹیک اچھی فارم میں ہے اور امید ہے کہ وہ پاکستان کو محدود کرنے میں اہم کردار ادا کرے گا جب کہ کوشش ہوگی کہ پاکستان کے خلاف جلد وکٹیں لیں اور اس کی بیٹنگ کو پریشان کیا جائے۔ ریان کک کے مطابق اگست میں ہونیوالی پاکستان اور نیدرلینڈز کی سیریز نے ان کی ٹیم کو پاکستان کی اسٹرینتھ اور اس کے مقابلے میں اپنی قوت کو جانچنے کا موقع دیا تھا اس لیے ٹیم کو اندازہ ہے کہ اسے کس چیلنج کا سامنا کرنا پڑے گا اور وہ اس چیلنج کے لیے تیار ہے۔ انہوں نے مزید کہا کہ پاکستان کا بولنگ اٹیک اچھا ہے اور اس سے نبردآزما ہونے کے لیے نیدرلینڈز کے بیٹرز نے انفرادی اور مجموعی پلاننگ کی ہے، امید ہے میچ میں اس پلان پر کامیابی سے عمل درآمد ہوگا۔ ایک سوال کے جواب میں ریان کک نے اعتماد ظاہر کیا کہ ان کی ٹیم پاکستان کو قابو کرسکتی ہے، کل دونوں پوائنٹس ٹیبل پر صفر پوائنٹ کے ساتھ میدان میں اتریں گی تو اس حساب سے دونوں ٹیمیں برابر ہیں، اہم بات یہ ہے کہ نیدرلینڈز اپنے پلان کے مطابق کھیلیں اور اچھے نتائج کے لیے کوشش کرے۔
